Mu birori ngaruka mwaka byabaye kuri uyu wa 24 Gicurasi 2026 byo kwizihiza umunsi mukuru w’Ishuri ryaragijwe Mutagatifu Bernadette-Kamonyi(ESB), Umuyobozi w’iri shuri, Padiri Majyambere Jean d’Amour yashimiye uruhare rw’Ababyeyi barerera muri iki kigo, avuga ku bufatanye mu kurera abana, abashimira uruhare bagize mu iyubakwa ry’inyubako igeretse y’ibyumba 12 abanyeshuri bigiramo, yuzuye itwaye asaga Miliyoni 228 y’u Rwanda. Yavuze ko intego y’iri shuri, ari“ Buri gihe bijye biba byiza kuruta uko ejo byari bimeze”. Abarimo Igisonga cya Musenyeri wa Diyoseze ya Kabgayi ndetse n’Ubuyobozi bw’Akarere ka kamonyi batanze Ubuyumwa ku babyeyi n’abanyeshuri barererwa muri ESB Kamonyi.

Ibi birori byahujwe n’icyumweru cyahariwe Uburezi Gatolika bufite Insanganyamatsiko igira iti“ Ndera neza Nkure neza Nkore neza”. Padiri Majyambere yijeje abarerera muri iki kigo, ababyeyi ko ba babareye aho batari. Ati“ Nagira ngo mbabwire ko tubabereye aho mutari, tuzagerageza kurera bano bana neza, bakure neza kandi ni basohoka n’aha ng’aha aho bazajya gukora bajye bakora neza”.

Mu gushimira ababyeyi barerera muri iki kigo, yagize ati“ Ndashimira mwese ababyeyi b’aba bana bacu, muri inkingi za mwamba mu burezi. Turabashimira Ubwitanjye, Ubufatanye mugaragaza mu burere bw’abana bacu, abana b’Igihugu bagakura ari abana bafite Umuco, bafite Uburere, bakunda Igihugu, bakunda Imana”.

Yakomeje abashimira ubufatanye mu iyuzuzwa ry’inyubako igeretse y’ibyumba 12 abana bigiramo. Agira, ati“ Tumaze gutaha igikorwa cy’ubufatanye iriya nzu twubatse. Ni iyanyu, mwayubatse mu mafaranga y’ishuri, Minerval(School fees) mwagiye mutanga, iruzuye! Yewe barayigenzuye rwose basanga yujuje ubuziranenge baduha n’icyangombwa. Yuzuye itwaye Miliyoni Magana abiri na makumyabiri n’umunani n’imisago. Buriya mwagendaga mutanga gahoro gahoro nanjye nkagerageza kubicunga neza birakunda. Ndabashimira ubwo bwitange!. Buriya iyo umwana yigira heza, byanjye bikunde birakunda”.

Padiri Majyambere, yashimiye kandi ubuyobozi bw’Akarere ka Kamonyi, ati“ Ndashimira ubuyobozi bwite bwa Leta by’umwihariko ubuyobozi bw’Akarere ka Kamonyi ukuntu dufatikanya kugira ngo Uburezi n’Uburere bibashe kugenda neza muri aka Karere”. Yakomeje ashimira abarimu, Abarezi bo bafatikanya mu kwita ku bana babaha Uburezi n’Uburere.

Yagarutse ku byiciro by’abana, avuga ko barimo ibyiciro bitatu ariko we afite bibiri, nta cya gatatu kirangwa muri ESB Kamonyi. Ati“ Ndashimira bano bana turera! Ni abana b’ingeri zose, harimo abatoya bo mu wa mbere kugeza mu wa Gatandatu, ariko burya abana babamo ibyiciro bitatu. Habamo abana bita;‘Baribwira, Barabwirwa na Tereriyo(terera iyo)’. Njyewe iyo ndebye abo mfite hano, nsanga ari ibyo byiciro bibiri bibanza. Harimo abibwiriza, hakabamo Ababwirwa bakumva, ariko ba Tereriyo ntabo”.

Yakomeje avuga ko nyuma y’uruhare rw’ababyeyi mu kubaka ibiro by’ikigo ndetse n’inyubako y’ibyumba 12 ubu byigirwamo, Ikigo gifite gahunda ya vuba yo kubaka aho abana barara kuko ngo aho barara ubu hatajyanye n’igihe ndetse n’ubwinshi bw’abanyeshuri kuko kugeza ubu higa abasaga 1700.

Musenyeri Jean de Dieu Hodari, Igisonga cy’Umwepisikopi(Vicaire Général) wa Diyoseze ya Kabgayi mu ijambo rye, yasabye abanyeshuri kumva no kuzirikana ibintu bitatu ari byo; Gukoresha igihe neza, kuko Igihe ari ingenzi muri byose, icya Kabiri ni; Kudatinya ibikomeye cyangwa se Kudatinya kuvunika kuko iyo wakoze cyane udacika intege ugera ku musaruro wavunikiye. Icya Gatatu ni; Kumenya aho byose biva. Aha, yababwiraga ko badakwiye kwibagirwa Imana, Gusenga kuko byose bigerwaho kubera Imana.

Yabwiye kandi Ababyeyi, ati“ Babyeyi, mukomeze murere abana neza bajye baza mu ishuri batavunitse cyane. Ingo nyinshi zirimo byinshi byiza ariko hari n’ahari ibibazo. Gushakisha Amafaranga ni byiza, Gushakisha Ubuzima ni byiza ariko iyo byateranije ababyeyi nta cyiza kirimo, ikibi ni ikibi. Ingorane babyeyi mwagira, mwahura nazo nti zigatume mutonganira, mu rwanira imbere y’abana. Mujye mwihangana, mujye mwitsinda uko mubishoboye kandi mujye mwemera Imana Izajya Ibafasha”.

Uzziel Niyongira, Umuyobozi w’Akarere ka Kamonyi wungirije ushinzwe iterambere ry’Ubukungu avuga ko umunsi nk’uyu ishuri nka ESB Kamonyi riba ryateguye rigatumira Ababyeyi, Ubuyobozi bwa Kiliziya Gatolika, Ubuyobozi bwite bwa Leta, ko ari umunsi wo gushimangira Imikorere n’Imikoranire.

Asaba abanyeshuri biga muri ESB Kamonyi kwigana Umuhate cyane ndetse no kugira ikinyabupfura kuko aribyo musingi wa byose. Ati“ Abana b’aha basanzwe bafite ikinyabupfura, basanzwe biga neza bagatsinda ariko kwigisha ni uguhozaho. Aba bana nibo bazubaka Igihugu ejo, niyo mpamvu twese tuba tugomba gukorana nk’inzego ari iza Leta, amadini n’amatorero, ababyeyi babyaye abo bana tugahurira kuri wa mwana tukamuremamo Umunyarwanda w’ejo ushoboye kandi uzagira aho ageza Igihugu mu buryo bwo kucyubaka neza”.

Yibukije Ababyeyi, Abarezi n’undi wese ufite aho ahurira n’Uburere n’Uburezi ku mwana kuzirikana ko hanze aha hari ibishuko byinshi n’ibirangaza ku bana, ko umwana utabasha kumvira Ababyeyi, utabasha gukurikiranwa n’Ababyeyi bigoye kumwubakamo wa Munyarwanda Ushobotse kandi Ushoboye.

Ati“ Ababyeyi bafite uruhare rukomeye n’Abarezi mu bigo, n’ubuyobozi natwe tukaza tubyuzuza mu buryo bwo kubaka uwo mwana. Gushobora ni bwa bumenyi akura ku ishuri, Gushoboka ni ya Disipuline, Ikinyabupfura ahabwa n’Ababyeyi ndetse n’izindi nzego uko turushaho gufatanya bikemera. Turifuza kubaka umwana ufite Ikinyabupfura kandi ukora cyane kugira ngo agere ku bikomeye”.

Ibirori by’uyu munsi mukuru w’Ishuri ryaragijwe Mutagatifu Bernadette-Kamonyi(ESB) byabanjirijwe n’igitambo cya misa, aho kandi abanyeshuri 40 bateguwe neza bahawe Amasakaramentu arimo; Isakaramentu rya Batisimu(kubatizwa), Ukarisitiya ndetse n’Isakaramentu ry’Ugukomezwa. Ni ibirori kandi byahuriranye n’Umunsi mukuru wa Penekositi, umwe mu minsi yizihizwa muri Kiliziya Gatolika, ukaba umunsi hazirikanwa igihe Roho Mutagatifu amanukira ku Ntumwa za Yezu. Ni umunsi uba nyuma y’iminsi 50 Pasika ibaye.

ESB Kamonyi, ni ishuri rya Kiliziya Gatolika ridatanga gusa Uburezi n’Uburere, ahubwo rinafasha abana kwidagadura mu mikino itandukanye ahanini ishingiye ku muco Gakondo nk’imbyino n’ibindi bituma bitabira amarushanwa ategurwa mu bigo by’amashuri haba ku rwego rw’Akarere, Intara n’Igihugu ndetse no hanze yacyo kandi bakaba mu batwara ibikombe kuko n’icy’uyu mwaka ku rwego rw’Igihugu mu mikino yo kugaragaza Umuco mu mashuri yisumbuye nibo bakibitse.” NDERA NEZA NKURE NEZA NKORE NEZA“.

Théogène Munyaneza